德甲重開後第二輪賽事，榜首雙雄拜仁慕尼黑同多蒙特上禮拜六都齊齊贏波，其中「1哥」拜仁以5:2大勝法蘭克福，湯馬士梅拿更收穫今季第17腳助攻，係自曼城中場奇雲迪布尼喺16/17球季後，五大聯賽單季最多助攻一人，而且好有可能喺今季餘下賽程再破呢位比利時球星喺德甲史上所創嘅助攻紀錄；至於多蒙特同日作客2:0贏禾夫斯堡場波，小將查頓辛祖亦貢獻一腳助攻，累積16次成為蜜蜂兵團單季助攻王。賽後兩隊相差四分，咁啱禮拜二兩隊將對撼上演天王山之戰，即管睇吓兩大助攻王──梅拿勁定係辛祖醒？
梅拿力追迪布尼紀錄
先講榜首嘅拜仁，上周六返到主場安聯球場迎戰法蘭克福，踢咗17分鐘梅拿就喺左路傳中畀哥列斯卡後上射入，幫拜仁先開紀錄，之後梅拿完上半場前再建一功，幫拜仁半場領先2:0。下半場羅拔利雲度夫斯基頭槌破網，射入今季德甲第27球後，領先三球嘅拜仁有少少放軟手腳，結果俾法蘭克福中堅軒迪列加連入兩個角球追到2:3。但拜仁技高何止一籌，球隊靠艾方素戴維斯嘅入波，同埋幫客隊入完波嘅軒迪列加無端端「擺老烏」，湊夠5:2大勝而回。
根據Opta嘅統計數據，功臣之一嘅梅拿喺德甲27場交出17次助攻，唔單止係目前四大聯賽嘅助攻王，仲係自16/17年球季曼城球員奇雲迪布尼後，成為首位單季助攻達17次或以上嘅球員。梅拿目前距離德甲史上助攻王、14/15年由當年仲踢緊禾夫斯堡嘅迪布尼所創出嘅21次，只係相差四次，30歲嘅梅拿喺餘下7輪聯賽如果再添5個助攻，就會追過迪布尼，名留德甲青史。賽後拜仁教練費歷克亦點名大讚：「我一定要強調梅拿嘅貢獻，好聰明咁善用場內可以發揮嘅空間。」至於梅拿就話：「我哋已定咗三連勝目標，好期待禮拜二鬥多蒙特，我哋要將冠軍帶返慕尼黑。」
葛斯失寵又離多蒙特
不過梅拿唔係冇對手㗎！講緊嘅就係多蒙特20歲小將查頓辛祖，蜜蜂兵團同日作客禾夫斯堡，先靠左翼衞拉菲爾古里路喺上半場先開紀錄，下半場後備上陣嘅辛祖就個人表演，帶波帶足大半場之後助攻畀右翼衞嘅阿拉舒夫入波，結果多蒙特淨勝兩球之餘，辛祖仲收穫今季第16個助攻，超越咗米希達利恩喺15/16年球季15次助攻嘅隊史紀錄。即管睇吓辛祖喺嚟緊嘅禮拜二，可唔可以帶領多仔贏到拜仁喇！正所謂一代新人勝舊人，隨住辛祖已成功上位，前德國國腳馬里奧葛斯已經徹底失寵，體育總監索克日前亦透露，已經同呢位兩度效力球會嘅中場傾掂數，季尾將會離隊。
