英超球隊曼聯新一季主場波衫，早前疑似網上曝光，劣評如潮，有外國網民認為紅底配黃色短間嘅設計，十足十巴士座位圖案，仲笑紅魔擺明泊大巴。點知一山還有一山低，同市宿敵曼城嘅新衫一樣出事，被球迷狠批「腰果花紋」設計勁娘，仲有網民認為圖案似顯微鏡下嘅細胞，甚至係病毒。
豹牌太前衞難頂
由twitter流傳照片見到，呢件由「豹牌」設計嘅曼城第三作客，以白底襯藍色佩斯利圖案（Paisley floral pattern）。據網上介紹，靈感源自60至90年代英國搖滾音樂風格，但網民恥笑新衫似抹布，仲有人話係最醜波衫。
「豹牌」自去年開始取代「一剔」成為曼城球衣贊助後，據報雙方簽咗張價值高達6.5億鎊（約61億港元）嘅10年約。有曼城球迷就喺twitter留言，指每當見到豹牌嘅「前衞」設計，都會勁鬧「藍月」當初改簽豹牌決定超錯。
曼聯波衫贊助費冠英超
當然你有你鬧，球會同球衣贊助商簽肥約收錢袋袋平安。好似利物浦早前離開「新平衡」同一剔簽約，下季起就改着一剔，每年就收7,000萬鎊贊助費。
球衣贊助合約金額差距真係可以非常大。三間同曼聯嘅贊助合約金額達每年7,500萬鎊，排英超第一，但同一個品牌同錫菲聯、屈福特簽嘅球衣合約，只係每年75萬鎊。
紅魔亦好在有同三間簽呢份英超每季最高嘅球衣贊助合約幫手，欠債先唔會達五億鎊。喺紅魔最新季度財務報告中，揭示咗武肺帶嚟嘅財務危機，當中曼聯債務加咗1.274億鎊，債務總額高達4.291億鎊，債務增幅達42%。相反截至3月31日，曼聯收入下降咗19%，報道仲話只不過係反映咗武肺嘅初步影響咋。
