女子組合Super Girls成員吳嘉熙（Cheronna）近日竟撇低一眾好姊妹，埋猛男堆搵食！其實是Cheronna跟樂隊Zpecial合作，為他們的新歌《我的片單》featuring，日前四子跟Cheronna齊集在九龍灣錄音室拍MV，其間幾位成員即場玩踢爆，指鼓手煒賢原來一早冧爆Cheronna，搞到女方面紅耳熱，但Cheronna聲言目前以事業為重，向煒賢大派檸檬。
打交叉請食檸檬
眾人坐下接受訪問時，三位成員識趣安排煒賢坐在Cheronna旁邊，接着主音Eddy說：「煒賢一直有留意Cheronna，有睇開佢嘅演出，好欣賞佢。」坐在Cheronna旁的煒賢亦大膽直認：「可以同偶像合作真係好開心，我都鍾意啲運動型嘅女仔，好明顯佢係，好健康。」Eddy笑指Cheronna喜歡看漫畫，煒賢即說：「睇漫畫都可以好健康，佢把聲又好聽，keep住都留意佢。」此時Cheronna已不停儍笑、臉紅兼掩面，表現得相當怕醜。Cheronna在去年10月宣佈與夏雨兒子黃奕晨分手，結束兩年情，回復單身的Cheronna隨時因此傳緋聞，她聞言即尷尬笑說：「唔好再問喇。」但煒賢似乎很受落：「呢啲遲吓嘅嘢真係唔會知道嘅……」問到Cheronna目前是否想工作行先？她即點頭示意，至於會否想拍拖，她即做出打交叉動作say no。
寫歌望下半年出
Eddy表示今次合唱曾考慮其他女歌星，但發覺Cheronna聲線最合適，再找監製出面邀請，結果一拍即合，Cheronna笑稱：「佢哋之前好誇咁讚我咩人靚聲甜，舞功了得，真係好尷尬。不過都好多謝佢哋搵我合作，因為我未試過同男仔合唱，我又鍾意玩和音。」過去幾個月因武肺疫情影響，Zpecial和Cheronna工作全面叫停，Cheronna表示：「嗰陣留喺屋企惟有寫吓歌，成功逼自己寫咗首歌，睇吓公司用唔用。」她希望下半年再推出新歌，更希望用上自己的創作。
採訪：寶妮
攝影：陳俊強