好的恐怖劇集難求，因為要長時間維持懸疑及驚嚇不容易，上年AppleTV+的《靈異女僕》（Servant）就水準高超，甚至被奉為神劇，不過因為大家只看Netflix，很容易走漏眼。
要算功勞，應該是導演禮切沙也馬蘭（M. Night Shyamalan）最大，他只幫手拍兩集，就把整季的風格設定好。禮切20年前自編自導電影《鬼眼》（The Sixth Sense）成名，之後製作過多套超級賣座恐怖片，縱然偶有失手，很快又回復人氣，已是當代恐怖大師。
禮切一向愛把現代人的各種恐懼放大做主題，尤其愛講大家忌諱的題材。5年前他拍的《凶訪》（The Visit），就以恐怖老人家為驚嚇位，你知道，有時老人家都可以好恐怖，之不過大家都不敢宣之於口。結果他以這個禁忌元素，以極低成本令電影公司大賺，亦令本來己連仆兩套大製作的自己翻生。
《靈異女僕》則講另一個敏感主題，挖出大家對生育及照顧嬰兒的恐懼。故事講一對夫婦，生下的兒子13個星期大時忽然夭折，母親受不了打擊，於是老公惟有用一個極真的公仔當做BB未死，而為了做戲做全套，兩人還請了一個女傭，到家裏入住照顧那個公仔，而在女傭悉心照顧下，公仔竟變成真BB。
這只是故事的開端，劇情發展下去，更是曲折離奇，青春美艷的女傭身份神秘，漸漸成為問題的根源。香港觀眾一定會特別投入，因為香港人除了緊張生育，亦對外傭又愛又怕，驚乜？驚佢勾引你老公啦，驚佢做埋啲古靈精怪嘢危害你生命啦，始終有陌生人同住，心生猜疑就少不免。《淪落人》只是童話故事。
劇集結尾亦保留禮切一貫風格，就是設下重重謎題，令你會忍不住重看，意圖解開箇中玄機。如果想不通不要緊，網上有不少網友提供答案。情況就如當年大把人睇完《鬼眼》，將它解構無限次。
劇中幾位主要演員都表現出色，尤其是《哈利波特》（Harry Potter）電影系列中飾演「榮恩」的路柏格連特（Rupert Grint）更是收放自如。其實《哈利波特》中幾位小朋友，多年來都努力開展演藝事業，希望由童星晉身為正式演員，當中以妙麗最快成功轉型，現只剩演哈利仔仍然走不出困局。
撰文：翁可人
本欄逢周五刊出
同宅同煲
酷愛煲劇睇戲，冷門熱門乜都殺，小說《師戀高校》及《87年12歲條女失咗蹤》作者。