英超日前公佈武漢肺炎病毒檢測結果，屈福特33歲嘅馬里亞柏就向傳媒公開自己就係其中一個確診嘅球員，呢位牙買加守將仲話自己喺居家隔離期間好少出街，唔驗都唔知自己中招。第二日車路士球星尼高路簡迪，就因為驚感染武肺而選擇唔返球會練波，睇嚟一班球員仲好擔心聯賽重啟後嘅安全問題。
林伯支持簡迪留家訓練
為咗英超可以喺六月中重啟，賽會喺周二已經畀球隊進行小組操練，但暫時球員之間唔可以有身體接觸，球員就投訴咁樣練波根本對提升狀態冇幫助。英國文化大臣杜永敦就話，預計今個星期內，各隊就可以進行有接觸、有碰撞嘅訓練，目前只係爭政府批准。現階段除咗球員之間唔可以接觸外，訓練嘅龍門架，足球都要徹底消毒，亦有球員投訴話個波噴完啲消毒劑後，因為天氣炎熱搞到「黐立立」好難踢，睇嚟英超淨係復操都有好多問題需要解決。
球員安全方面，就因為屈福特嘅馬里亞柏中招嘅消息，搞到車路士嘅簡迪都怕怕。周二車仔復操大家仲講緊呢位29歲嘅法國中場留咗個新髮型，一日後佢就缺席咗球隊喺訓練基地嘅訓練，原因係簡迪家族有心臟病史，佢老竇同大哥都因心臟病去世，所以佢為咗減低感染機會就向球會要求居家訓練，有指車路士董事局同林柏特都好明白呢位法國中場嘅感受，亦非常支持佢嘅決定。除咗簡迪之外，缺席車仔第二日操練嘅仲有「強姦犯」赫臣奧杜爾，球隊話佢係因病請假，表明同武肺同埋涉嫌強姦無關。
基奧特踢爭氣波有約續
車路士亦都宣佈同33歲的法國前鋒基奧特續約1年至20/21球季季尾。基奧特原本同車仔嘅合約6月30日就到期，上半季不受重用嘅佢一月仲幾乎離隊，咁啱譚美阿巴謙突然受傷令佢有更多上陣機會，出色嘅表現令車仔決定執行合約中同佢續約一年嘅選項。基奧特就話：「好開心可以繼續喺車仔嘅旅程，我好期待再次着上車仔波衫，喺滿座嘅史丹福橋球場享受足球，當然要喺安全嘅情況下啦。」同日嘅較早時候，車仔亦同38歲嘅後備門將韋利卡巴尼路續約1年，呢位阿根廷門將亦都會效力至下季結束。
