畢爾包老牌前鋒阿度里斯周三透過社交網站，宣佈因髖關節傷患，無法替球會踢埋嗰場因為武肺疫情一直未踢得嘅西班牙盃決賽，無奈選擇喺39歲之齡高掛球靴。阿度里斯周三喺Twitter突然宣佈退役，仲寫咗一段感人嘅離別宣言：「我講過足球會喺你離開佢之前選擇離開你，噚日醫生要我盡快去做髖關節手術，我至可以正常咁生活落去，我嘅身體已覺得『夠』喇……」佢隨後又講到疫情：「不幸嘅係，我哋正生活喺嚴峻同痛苦嘅局勢之中，武漢肺炎疫情帶嚟無法挽回嘅損失，我哋必須繼續抗爭，因此我唔想令你哋為我掛靴呢件小事而擔心，呢場夢想中嘅決賽（西班牙盃），我哋都係忘記佢吧啦。」