英超賽會早前講過聯賽計劃喺六月重啟，仲會傾向舉行頒獎儀式，咁喺英超聯賽榜領先25分嘅利物浦（圖）屆時可享受奪冠滋味！作為紅軍30年來首個頂級聯賽冠軍，咁呢件冠軍波衫當然係充滿商機。其實利物浦同New Balance嘅贊助合約將喺5月31日屆滿，咁紅軍喺六月復賽嗰陣就應該着新贊助商Nike嘅新波衫，但係日前三方達成咗協議，紅軍將會着目前嘅波衫至完季，咁就意味紅軍嘅封王波衫仍然係由New Balance提供。利物浦同Nike嘅球衣贊助合約價值每年7,000萬鎊（約6.6億港元），本來係今年6月1日起生效，但由於疫情影響咗賽季，雙方決定將合約日期推遲至新球季開始，Nike亦因為咁得到一筆賠償。