教育界議員葉建源噚日喺立法會講述教協嘅問卷調查結果嗰陣，突然有女記者問佢對教協被指喺旺角同銅鑼灣會址有僭建有乜回應，當葉sir問佢係嚟自邊間媒體時，呢位女記口窒窒咁答：「東方星島」，不過兩報記者都未見過呢位「同事」。
曾同習總握手 幫777助選
有《東方》記者事後查詢呢位女記嚟自邊個傳媒，問佢點解要冒認兩報記者嗰陣，女記冇表明身份，只話：「我冇冒認啊！我只係睇到佢哋嘅報道」，繼而喺立會走廊拔足狂奔落扶手電梯，其間一直拒絕表明係邊間傳媒記者，再掩面大嗌：「唔好意思！我可唔可以求救？」之後衝咗入平日只准立法會保安進入嘅保安室。
呢名女記者最終留喺保安室十幾分鐘後，喺一名無綫攝影師陪同下行出嚟，話要為早上產生誤會致歉，指自己回應葉sir問題嗰陣，以為對方問佢睇咗乜嘢傳媒報道，所以佢就答「東方星島」。至於點解被問到嚟自邊間傳媒機構，一直唔肯交代仲要突然狂奔，佢話係因為見到有人攞住部機影，搞到佢好驚，所以就匿咗入立法會保安室。
八方發現，呢位叫章詠欣嘅大台女記者「大有來頭」，過去除咗曾任港大學生會國事學會第45屆幹事會主席，更曾經喺2017年林鄭參選特首嘅競選分享大會，企正林鄭隔離。中共國家主席習近平2017年訪港，佢更曾現身停機坪迎接同習近平握手，成為極少數可近距離接觸習大大嘅港人，唔通怕外界知道自己呢位「紅人」加入TVB，會太受關注想低調啲？
李八方