因武漢肺炎病毒導致重開嘅韓職聯賽都要喺空場作賽，為免疫情下閉門作賽氣氛欠佳，FC首爾就諗到喺對FC光州嘅韓職賽事，放咗好多個類似性用品商店嘅吹氣公仔做現場觀眾。最終喺一片爭議聲下，佢哋出嚟道歉澄清，解釋呢啲只係一般時裝店見到嘅服裝模特兒公仔。但係呢批公仔嘅供應商Dalkom，其實係售賣性用品嘅公司，加上看台場上嘅公仔「清一色」係女人，咁就真係「水洗都唔清」！韓職賽會當然唔會接受佢哋嘅解釋，仲喺周三召開紀律委員會後，隨即宣佈向佢哋重罰1億韓圜（約65萬港元），仲發咗聲明譴責FC首爾損害咗韓職嘅聲譽，仲係對女性同埋擁有家庭嘅球迷造成極大侮辱。