作為天生乞人憎的物體，小粉紅其實偶爾也有可愛之處，想像中他們應該生得和《星球大戰》的BB-8有幾分相似，有事無事滾出來嘰哩咕嚕，只要你聽過佐治魯卡斯金句「電腦零件的崩潰足以摧毀一個程式」，就會抱住睇戲心情觀望他們的躁動，《紅樓夢》裏呆霸王薛蟠話齋，「一個蚊子哼哼哼，兩個蒼蠅嗡嗡嗡」，唱完唱罷一哄而散，連噴殺蟲劑都費事。譬如儲精蓄銳為嗌交女神華大媽護航，竟然搬出對岸小英醜聞作轉移視線武器，指相對洋洋灑灑的畢業論文內含四百錯字，一句三錯算不了什麼。哈哈年輕人，你咪以為基伯冇讀過牛津劍橋，就唔知論文係乜東東啊吓，這種尊貴的高等學院書寫，字數以萬為計算單位㗎，既然你中意玩數字遊戲，勉強陪你癲一陣啦：拉勻嚟講，小英點都冇華大媽咁論盡，後者一句三錯的功力，一萬句就有三萬錯，第個唔信你都要信林鄭，鐵證如山不容抵賴啊吓。
數口欠靈光的我，本來不懂數字的奧秘，幸好這幾個月天天留意武肺新聞，漸漸明白數學雖然原則上不說謊，統計家的觀點和角度，卻可以左右整體印象。法國衛生部長就是這方面的高手，起初老老實實報告確診人數，每日一千幾百疊羅漢，教人聞之喪膽，為了保護國民弱小心靈，不久便果斷改行避重就輕途徑，將聚光燈照向醫院床位，集中火力話畀大家知痊癒個案有幾多，圖表顯示入院病人攀上飽和點後比例節節下跌，簡直深諳報喜不報憂精髓。同樣表演語言偽術，外國月亮果然特別圓，比香港不能冒犯組織的發言人得體多了──最大分別是心地善良。