九唔搭八，塞嘢入曼德拉把口，隻死貓好快被摳返出來。曼德拉是入了棺材唔再流眼淚的聖雄，今鋪被鄭柒市長老屈，清棺難審。郭法官高尚情操琅琅上口，曼德拉的南非國父語錄，被一個認叻認唔切的市長玩弄出處，推卸說是「有不同的版本」。郭法官嘉許鄭市長有歉意，認為DSE試題是釘死鄭市長事業的最後一口釘，佢唔拎牛肉刀劈考評局高層個肺，已經好克制囉。
時日無多的鄭市長，幻想曼德拉金句有不同出處版本，這種鬼話日後陸續有來。譬如，曼德拉交叉PK一哥，後者講「教育的崩潰足以摧毀一個國家」，港警受毅進教育嘛，《頭條新聞》嘻笑怒罵，慘被當係教育電視，PK幽默自己唔幽默港台，欠器量，終將摧毀香港財路，一個國家的黑錢，往何處乾洗漂白好呢？
曼德拉聯乘再出發大聯盟，下場如何？為首的N位團友殘酷摧毀學生，以催淚彈和暴動罪「教育」年輕人，這批老海鮮，攬炒都會撳錯掣，出發北上，唔使成龍做吹哨人警告都知，隨時爆，柒鑊熟！2020年，自high皇帝陛下與奉承者齊齊杏家橙，對全宇宙全人類利多於弊。同意乎？信納「曼德拉效應」的鄭市長，揀定紅繩，搵位上吊。