今年DSE歷史考試一條必答題嚟講，引起無限討論，教育局首席秘書長陳碧華發言似一個無知師奶，竟然公開在記者會講：「一啲歷史事件唔可以開放討論！」佢講乜嘢呀？身為教育局高官，活在香港，竟然膽敢話一啲歷史事件唔可以開放討論？佢既有此意思，唔該教育局公佈一份負面清單，寫明有何歷史事件唔可以開放討論？文革死人無數、大躍進禍國殃民、三反五反批鬥死不少高級知識分子、1989六四事件，究竟有那一件不可開放討論？毛澤東三番四次表示多謝日本侵華，壯大共產黨呢？
日本侵華，對中國之利弊，從考評局考試提供資料及就我地所知嚟講，可以有四方面利弊：
（一）對滿清帝國係弊多於利，孫中山黃興皆向日本求取援助搞革命，推翻帝制，直情係反華反中惡勢力，引入外國勢力干預滿清中國內政，最後清朝傾亡；如以滿清中國觀之，日本對中國絕對有弊無利，但站在漢族推翻帝制，建立共和角度睇，日本在1900年代對中國很有利！
（二）中國泛指中國人，日本侵華，中國軍民死傷慘重，經濟崩潰，更有南京大屠殺，日本侵華對中國人絕對係有弊無利。
（三）孫中山推翻清帝，建立中華民國，蔣介石北伐功成，1927至1937有十年中興現象，何如日本步步進逼，發動侵華戰爭，中華民國忙於抗戰，逼於放生造反派中國共產黨。抗戰勝利後，中華民國元氣大傷，還未復元，便有毛澤東造反，最後於1949被中共在內戰擊敗，大陸拱手相讓。日本侵華，對中國（中華民國）絕對有弊無利。
（四）中國在1949年以後是中華人民共和國，毛澤東當權，毛澤東之能站上天安門，不在延安鬱死，當然要多謝日本侵華，令蔣介石不得不停止圍剿，讓其得延殘喘，跟住在抗戰大後方壯大，卒能踢走國民政府，成立新中國，以此視之，日本侵華，對新中國有大利，唔怪得毛澤東對日本友人講多謝。（陳碧華女士是否可以開放討論呢條呀？）
今年中文考生若以上述答案交卷，8分之中唔知可以攞幾多分呢？網上因此題而引來發掘毛澤東多謝日本侵華之言論，在藍絲眼中，犯了大忌，好唔高興。教聯會主席何漢權係教中史嘅，如有學生問起老毛感謝日本之言，會畀甚麼答案？老毛其實好誠實，係嗰句就講嗰句，楊潤雄話毛澤東之言係外交場合講話：「每一段話都有背景和當時環境，佢想表達的意思，未必完全由字面去解釋。」言下之意，老毛係刻意討好日本友人，故出外交詞令，發多謝之言？楊局長敢膽老屈老毛言不由衷，叻過外交部發言人。