真正嘅F1賽事因受武漢肺炎疫情影響暫停，但係電子虛擬F1已經嚟到第六站。過去幾站嘅虛擬F1，吸引咗唔同運動員「踩過界」，曼城前鋒阿古路、皇家馬德里門將泰拔高圖爾斯，同埋拉素前鋒恩莫比尼都玩過。今次摩納哥站就會有阿仙奴前鋒奧巴美揚，代表麥拿侖車隊出戰。至於過去5站曾出戰4站嘅法拉利車手勒卡歷，就試過連續兩站封王，係目前奪冠次數最多嘅玩家，唔知今次返到家鄉摩納哥站，會唔會再贏一場呢？講到打機，適可而止最緊要，但係李斯特城嘅爆炸頭中場咸沙袓靴里，就承認喺聯賽停擺期間被打機分心，仲會打到凌晨先至瞓，又好晏先至起身，影響咗佢嘅球員生活。