黃色經濟圈越做越大，親中團體同政府都視為眼中釘，講到「黃色」兩個字變成敏感字眼咁滯。不過有網民近排發現「黃色」兩個字似乎真係變咗敏感詞。
話說有連登仔開po，話喺Google搜尋嗰陣，會彈出一大堆相關建議字眼出嚟，奇就奇在打「黃色」兩字，Google就冇提供任何搜尋建議。就連打「黃色經濟」、「黃色經濟圈」都冇相關建議字眼彈出。
官方噚晚已修正
睇見香港政府近排咁積極打壓異己，網民都自不然諗，唔通「黃色」真係出咗事，質疑美國公司Google家陣係咪打壓埋一份先？有網民都試過搵一啲敏感政治字眼，不過一切正常，照樣出到相關搜尋建議字眼。八方都試過搵「黃店」、「黃圈」、「黃絲」都一樣冇問題。
究竟「黃色」兩字點解有特別招呼？Google發言人回覆八方，話佢哋對於預測查詢字眼（Autocomplete），其實有清晰政策規定，禁止包含煽情露骨、粗俗或不雅內容。但佢哋都承認演算法未必每次都可以拿揑準確，知道個情況之後，已即刻檢視同修正。八方噚晚7點左右再喺Google搜尋「黃色」兩隻字，相關搜尋建議字眼的確出返晒嚟，彈出嚟嘅第一項就係「黃色經濟圈」。