早排港府招標邀請公關公司參與「香港重新出發」國際宣傳計劃，八方寫過包括美國公關龍頭Edelman；為沙特漂白嘅法國公關龍頭MSL；同熟悉新加坡式新聞操作嘅新加坡公關公司Redhill，但唔夠幾日，MSL確認已撤回標書唔玩，似乎為港府洗白仲難過幫沙特漂白。
專門報道公關界資訊的網站PRovoke早前公開呢三間公司有入標，PRovoke噚日再報道，話自名單公開後，上述公司喺社交媒體遭到大量抨擊。MSL姊妹公司Qorvis為沙特喺人權狀況、公開處決等醜聞擋駕，對社會爭議見怪不怪，但香港MSL嘅員工對入標持不同意見。PRovoke仲引述MSL亞洲CEO Margaret Key指，MSL同Qorvis都會退出今次競標。
之前政府好高興話有七間公司入標，今次問MSL公司是否撤回標書，仲有冇其他公司撤回標書，政府新聞處發言人冇正面回應，淨係又講招標程序。咁又係嘅，唔通認自己差到有人打退堂鼓咩！