公仔箱前花旦「聰明水」本來已減產減到幾年先有一部新作品，近年佢仲由幕前走去幕後，一邊學一邊做，同圈外老公以夫妻檔一齊開公司搞製作，利用自己喺呢行嘅人脈關係，當然會碌到好多人情卡，包括邀請台前幕後幫手拍嘢，而聰明水兩公婆做好嘅製作，就會賣返出去賺錢。
Jessie聽聞聰明水搵人拍嘢畀嘅酬勞唔係好高，成日話小本經營叫人拍膊頭，好多幕後諗住有工開，都會願意平少少接job，希望大家都有飯食，畢竟娛樂圈嘅工作係唔固定，完全係「好天收埋落雨柴」。
尾數近百萬元
不過上年曾經同聰明水合作過嘅幕後人員，就同Jessie呻話收唔到聰明水出嘅尾數，佢哋計計埋埋嘅總額，原來有近七位數咁多，Jessie聽聞呢班苦主都有不停向聰明水兩公婆追數，佢哋就一直拖字訣，其實打工仔人人都等錢開飯，尤其呢筆錢係疫情爆出前就應該要找數，𠵱家武漢肺炎令全個娛樂圈幾乎停頓，好多台前幕後都冇工開，應得嘅酬勞又追討無門，人人都雪上加霜。Jessie希望聰明水兩公婆要有良心，拍膊頭時就要人收平啲，到要找數就應該爽啲手，而唔係拖得就拖，快啲找埋尾數畀班苦主，咁先會再有下次合作吖嘛。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
