近日香港DSE歷史科考試，問到學生喺1900至1945年期間日本為中國帶嚟嘅影響係咪「利多於弊」，結果引發唔少爭議。不過，上輪德甲閉門作賽對主隊嘅影響，就毫無爭議地「弊多於利」，事關各位球迷期待已久嘅歐洲主流聯賽，德甲總算喺閉門作賽之下，順順利利完成咗重開後首輪賽事，包括禮拜一利華古遜作客4:1大破雲達不來梅。結果首輪九場比賽，竟然只得多蒙特喺主場贏波，其餘八支主隊唔係和就係輸，似乎冇球迷打氣之下，主隊失去咗「主場之利」喎！
先講禮拜一晚場波，第5位嘅利華古遜作客尾2嘅雲達不來梅，雖然兩隊實力係有差距，但不來梅話晒都算係德甲老牌球隊，護級心切加上佔有地利，斷估可以踢好啲啩？
僅多蒙特主場贏波
點知落到場主隊冇厘神氣，踢咗28分鐘就俾利華古遜嘅20歲新星夏維斯接應傳中頭槌破網，雖然謝比施拿斯兩分鐘後靠角球追平，不過有「新波歷克」之稱、身高達1米9嘅夏維斯，再接應罰球頭槌頂入「起孖」，取得個人今季第12球，幫客軍半場領先2:1。換邊後不來梅仍然谷唔起，俾客軍嘅米素爾韋沙同迪米亞巴爾再破大門，結果利華古遜作客4:1大破雲達不來梅，賽後已追到同第4位嘅RB萊比錫只差1分，輸波嘅不來梅距尾3嘅杜塞爾多夫仍有5分，剩番九輪護級危危乎。
閉門數據有利客隊
總結本輪九場德甲嘅戰果，心水清嘅球迷可能會發現，主隊似乎冇乜優勢喎！九支主隊中只得多蒙特喺主場贏波，其中原本有力爭冠嘅RB萊比錫，喺主場只能逼和弗賴堡1:1，跌埋落第四，想追上榜首嘅拜仁慕尼黑已經凍過水；賀芬咸仲要主場俾同級對手哈化柏林炒三蛋，認真冇面，好在球迷冇得入場，唔係爆血管都似！
事實上，喺賽前已經有人研究過自二次世界大戰後所有閉門嘅比賽，大部份更加係自2002年打後嘅賽事，並唔係咩遠古數據，當中統計咗192場嚟自法甲、意甲、西甲同歐洲賽比賽，結果發現客軍喺正常比賽嘅勝率只得26%，但當閉門作賽，客軍勝率卻升至34%，報道又話閉門作賽後主隊入球通常較少、客軍平均每場拎少0.5面黃牌以及補時時間較少等。
反觀主隊由正常比賽高達46%嘅勝率，閉門比賽下會下降至36%，重開後首輪德甲更只得多蒙特可以贏波，主隊勝率更急降至只得10%，睇嚟各位球迷近期睇波甚至喺足智彩投注，可以呢項數據參考吓。不過今輪德甲，多支勁旅好似拜仁慕尼黑、慕遜加柏、利華古遜咁，都安排咗喺作客比賽，或者佢哋下輪返到主場，主隊嘅勝率有望回升呢？
