本港新一季失業率進一步攀升，當中維修、洗滌、家居及其他個人服務活動的失業人數，由6,100人增加至8,800人。從事汽車維修的33歲王先生，去年底被僱主辭退後一直失業至今，到勞工處就業輔導中心亦未能覓得合適工作，結果由租私樓單位變租劏房，又向父母三度借錢捱過經濟難關。失業後他曾想自殺，「冇太太同冇女嘅話，我話唔定已經跳咗落嚟，因為我見唔到希望。」
與妻女由私樓搬入劏房
33歲王先生原在元朗車房從事貨車維修技工，月入28,000元，養活妻子與8歲女兒。去年中運輸業開始萎縮，維修單大減，他被公司要求每月放一周無薪假，收入減至20,000元，去年底遭辭退後失業至今。
他一直嘗試搵工，包括到勞工處招聘會排隊填表格，爭取面試機會，但一直未能成功配對貨運或維修汽車等工作，「前前後後嚟勞工處，嚟咗十幾次，打電話15個左右，有13個回覆已經唔需要請人，剩低兩個真係人工太低，冇辦法，就算我肯做，都唔夠我去維持家庭」。
家中經濟到了捉襟見肘地步，他由租住沙田第一城月租13,000元兩房單位，搬至大圍租金9,000元劏房，並盡量留家煮飯，減少使費，「以前每年都有同囡囡去一次或兩次迪士尼，或者海洋公園，今年一定唔使諗啦。」
每月家庭開支萬多元，他無奈向在廣東生活的父母三度借下共20萬元，「我都唔好意思再向屋企人開聲了。」因生活壓力而失眠，他多次有自殺念頭，受訪時數度強忍眼淚，聲音沙啞地說：「如果唔係有個阿爸、阿媽咁撐我，我估今時今日，我唔係妻離子散，就係已經跳咗落嚟。」
■記者林 熊