特區政府動用8億公帑推「銅芯抗疫口罩」，按道理，作為特區塔尖嘅問責官員同一眾高官，都應該身體力行，戴上呢個「銅芯抗疫口罩」，連最初話唔使戴口罩嘅特區之首林鄭月娥，噚日見記者時都戴上。
不過，似乎唔係個個官員都buy呢個口罩，噚日政府開記招宣佈最新防疫限制措施，同場嘅食衞局局長陳肇始、該局副秘書長陳偉基同埋民政事務局副秘書長李百全，都只係戴普通外科口罩，只有剛於上月22日坐正做民政事務局局長嘅徐英偉戴上「銅芯抗疫口罩」。作為民建聯成員嘅徐英偉自然懂得政治正確，但呢個被網民諷笑似阿婆底褲嘅口罩，就唔係個個可以駕馭，八方發現呢位新紮局長發言時，多次「離晒罩」，口罩不停滑落，佢多次用手觸碰口罩表面調整位置，搞到佢勁尷尬，最後更索性全程用手扶着口罩，以免滑落。
叫錯陳肇始洋名
浸過洋水嘅徐英偉喺記招上，多次以「Sophie」稱呼洋名為Sophia嘅陳肇始。其實Sophie同Sophia係相通，係朋友同事間嘅親切叫法，但陳肇始對徐英偉嘅親切叫法無乜反應，似乎唔多受落。
李八方