財委會噚日續審海洋公園54億元撥款，商務及經濟局局長邱騰華同一眾海洋公園嘅管理層都有出席。咁齊人，所有議員梗係一齊質問撥款原因，連平時瞓覺多過開會嘅民建聯黃定光都鮮有精神咁開會，仲嬲到要大鬧「仆街」呀！不過個會由「打茅波」陳健波主持，自己友梗係唔會叫佢收回或趕出會議廳啦！
改口話「凋零」
話說邱騰華解釋，海洋公園因為疫情要閂門搞到財困。同樣做生意嘅進出口界議員象哥，可能諗起生意曳咗都嬲嬲哋，就話「𠵱家各行各業都仆街啦！」嘩！話晒立法會都係莊嚴之地，八方聽到一額汗，一眾議員即刻嘩嘩聲。呢個時候，明明日前喺內會好「威風」咁驅逐民主派議員嘅財委會主席陳健波，對住自己人果然係唔同啲，叫象哥繼續講，「不過就唔好講頭先嗰兩個字喇」。象哥聽到其他議員咁大反應，就即刻改口話「凋零囉，凋零呀，OK？」不過咪睇象哥好似好嬲，其實佢講到明會支持撥款，鬧句「仆街」都係做吓戲交吓貨，查實象哥一向都多騎呢嘢，試過開開吓會剪指甲，點知俾新同盟范國威踢爆，仲爆粗話返人轉頭，但事後又話「我唔知咩叫粗口」喎。