祖雲達斯名宿迪比亞路日前因為生腎石要到急症室求診，目前仍然喺美國洛杉磯一間醫院留醫，呢位一代意大利金童直言，冇法相信一粒細細嘅腎石，可以帶嚟咁巨大嘅痛楚。曾協助意大利贏得06年世界盃冠軍嘅迪比亞路，喺ig上載咗兩張喺洛杉磯UCLA醫院留醫嘅相片，並留言話：「我至今仍然唔能夠相信，呢粒只得3毫米大小嘅東西，可以造成咁巨大嘅傷害。」頭髮明顯稀疏唔少嘅迪比亞路喺病床上戴住口罩，盡顯老態，不禁令人擔心佢嘅情況，但佢澄清戴口罩只係要預防感染武漢肺炎。現年45歲嘅迪比亞路喺洛杉磯擁有一間餐廳，佢上月接受傳媒訪問時就話，生意因為武肺疫情大受打擊，嚴重到甚至要關門停業，令佢嘅生活亦大受影響。