歐洲足協（UEFA）會長施費連日前接受訪問時表示，有信心歐洲大部份地區都可以完成賽季，但就只能安排閉門作賽，唔可以畀球迷入場，佢話：「我哋已有計劃，但仲要等待UEFA執行委員會落實賽期。我只可以講根據現時情況，本季歐戰會完成所有賽事，一切順利嘅話，八月就會完成。 」BBC早前報道，歐聯同歐霸盃賽事將喺八月重開，而8強同4強階段仲會保留兩回合賽制。法國政府早前宣佈，禁止喺九月前舉行大型體育活動，但法甲球隊巴黎聖日耳門同里昂，目前已分別打入歐聯8強同16強，施費連指兩隊之後嘅主場賽事，可能要安排喺中立場上演。至於因為疫情而押後至明年進行嘅歐國盃決賽周，施費連承認可能無法按原定計劃喺12個城市舉行。