月初開「咧」嘅韓職聯賽，喺疫情下全部比賽都要閉門作賽。周日FC首爾喺主場1:0小勝FC光州嘅比賽，主隊喺看台上放咗一堆人形公仔為球隊打打氣（圖），驟眼睇好似係模擬性愛用途嘅娃娃嚟，結果惹嚟唔少批評。FC首爾球會喺周一急急作出公開道歉，但強調場上批人形模特兒並唔係外界所指喺性愛商店賣嘅「吹氣公仔」。FC首爾指出放人形模特兒嘅原因純粹係加強比賽氣氛，人形供應商Dalkom亦保證呢批人形模特兒並非性用品商店所發售嘅產品，而係類似服裝模特兒嘅人形，之不過呢間Dalkom公司本身正正係有生產性愛娃娃商品，會方聲明亦冇解釋點解要搵佢哋同點解要搵Dalkom負責，而場上所有打氣公仔亦只有女性外表，呢次解畫都幾難令人信服。