博洛尼亞教練米赫洛域近日接受傳媒訪問時透露，瑞典神鋒伊巴謙莫域下季肯定唔會留喺AC米蘭：「佢將會加入我哋（博洛尼亞），或者會返瑞典。」據報伊巴早喺一月轉會窗曾經考慮過加盟博洛尼亞，但最終選擇咗米蘭，不過喺疫情期間，伊巴就返到自己有股份嘅瑞超球會哈馬比操練。作為伊巴好友，米赫洛域透露季尾同米蘭完約嘅伊巴，下季前途未定：「佢幾日前曾打電話畀我，我哋將會喺夏天得知佢嘅決定。佢當然唔會留喺米蘭，係咪加入我哋，定係返瑞典就仲考慮緊。」患有白血病仲繼續督師嘅米赫洛域，堅稱佢同前國際米蘭隊友伊巴係非常要好嘅朋友，彼此間互相尊重：「伊巴對我嘅態度同其他人唔同，因為我哋都係危險嘅人！」