兩辦出到聲干預立法會內會選主席，搞到懶懶閒咗半年嘅建制派要嗱嗱臨總動員打仗，但除咗個別建制議員喺民主派議員拉開黑布時有行出去拉扯同鬧交外，其餘大部份時間都留喺位。建制齋坐都算，但有人竟然喺關鍵時刻唔睇實現場，走去做啲比李慧琼係咪做得成主席更重要嘅嘢，咁係乜呢？原來就係訂芒果！
750蚊6個
噚日黑箱內會舉行投票期間，禮義廉葛珮帆被傳媒影到以WhatsApp落柯打，用750蚊6個嘅價錢訂購台灣蜜雪芒果，仲好豪氣話「我可以要兩盒嗎？」呢隻又名高雄四號嘅台灣芒果，算係新品種，係夏雪同愛文芒混種而成，2012年先正式獲高雄市實驗農場認證，2016年正式開售，喺台灣名氣都幾大，但香港唔算好受歡迎，照咁睇葛博士都幾識食，知台灣好嘢，全力支持台灣農業。
但識搵好嘢食唔代表醒嘅，事關有生果商事後喺社交媒體踢爆，話蜜雪芒今年市場零售價賣緊60蚊個，但葛博士個訂購價就足足貴一倍有多，唔知葛博士係咪被人當咗「水魚」呢？
李八方