現年26歲、有翻版高海寧之稱的女DJ安采妮，在2016年被網台主持人陳達仁發掘，已婚的陳達仁一直對外聲稱是安采妮經理人，不過外間一直傳二人關係瞹眛。女方前日拍片爆料，指與陳達仁四年的合作中，陳達仁試過以GPS追蹤行蹤、轟炸式的電話短訊騷擾自己家人及朋友，她聲稱曾因此萌生輕生念頭。
追蹤行蹤
安采妮在片段甫開始就指整個月沒有更新fb，因想避開陳達仁，她說：「本身諗住直接消失，平平靜靜過自己生活，但係我受到嘅騷擾係十分之大。」她透露2016年起跟陳達仁合作做網台節目，首半年一切正常，漸漸陳達仁的控制慾變強，她說︰「問我識乜嘢朋友，又send訊息畀我朋友，就算同表姊出街，都要視像聽表姊把聲證明同佢一齊，就算滿足晒佢，都不斷WhatsApp要知道正確地點。同朋友食晚飯，就話我去飲酒，佢就send咗160個訊息畀我朋友係咁鬧，鬧人哋媽咪，後來發現咗佢喺我架車裝咗GPS。」
安采妮表示為避開對方連夢想都可以放棄︰「我算喇，正正常常做返啲嘢，你放過我啦，過去四年諗過好多方法結束自己，媽咪因為你喊過好多次。我好辛苦晚晚發噩夢，可唔可以收手，𠵱家唔知幾時見到阿爸阿媽，因為驚你跟到條線，你放過我啦，唔想再同你有瓜葛，打份工就夠。今生今世都唔想再見到你。」
自爆婚變
其實，陳達仁大前日曾拍片隔空尋找安采妮，又自認脾氣差及安采妮埋怨「沒自由」。陳達仁昨日下午4時回覆《蘋果》，問他是否出軌追求安采妮？他說：「嚇得我，平時你哋唔寫，𠵱家走嚟寫，咁搞笑。」再問二人的關係，他表示：「係戰友，由冇人認識到有人識，戰鬥到𠵱家，近日同佢有少少拗撬，佢去咗避世，我急住搵佢，同佢冇合約，大家講個信字。」
陳達仁又自爆和太太年半前婚姻出現問題：「𠵱家仲住喺同一間屋，但已分開瞓。2018年我生意高峯，忽略咗太太，𠵱家挽回唔到，我哋之間唔關采妮事。」對於采妮指控，他說：「滋擾佢？點解會咁講？有啲誤會，我搵過佢，佢突然失蹤，咁算唔算騷擾！」傍晚5點半左右，他於fb拍片澄清，未幾他將澄清片及之前尋找采妮的短片刪走。晚上7時許他再拍片說︰「佢塑造我成為世界大魔王令我驚訝，你辭職都同我講清楚。我都好想喊，爭落周身債，四年嚟周圍撲水支持一個龐大生活。」
採訪︰陳杰
【翻版高海寧與鴨王傳緋聞】
【童星出身】安采妮現年26歲，有「翻版高海寧」之稱。兩歲做童星，與周潤發拍廣告。2016年與陳達仁合作主持網上節目《達仁在線》。同年她與「鴨王」何浩文拍電影，有指男方力追，又上門玩狗及借故灌酒，陳達仁即公開鬧男方居心叵測。
而39歲的陳達仁曾自爆被「娛圈千后」騙去40萬，做過看更、殯儀業、經理人、電影老闆投資者等，近年加入黃毓民創辦的網台做主持。最廣為人知是2015年牽涉入盧頌之（DaDa）醉駕撞車事件，當日他借了弟弟的私家車給DaDa駕駛，結果撞車，坐在後座的陳達仁右手臂骨碎裂。