【黑鏡線索】
武漢肺炎輸出全球，各地政府發現，物資供應靠人嘅話，有起事嚟原來好大鑊。醫療物品固然唔可以再假手於人，長遠嚟講，電腦晶片就更加關鍵。
晶片係人類應用科技嘅尖端，即係如果外星人落嚟地球，叫地球人晒冷，晶片應該會同粒子撞擊器排喺前列。最高端嘅晶片，產地一係南韓一係台灣。有位美國空軍顧問，直頭話台灣係成個美國科技界嘅single point of failure，即係一旦台灣晶片業有乜三長兩短，美國科技公司就冚包散。
磨出高技術 中美靠晒佢
全世界，能夠量產手機用晶片嘅公司，一隻手數得晒， 得三間：美國Intel，韓國Samsung，同台灣台積電。而Intel主要係生產自家設計嘅晶片，做代工嘅最勁就係台積電。美國科技界嘅single point of failure，仔細啲講，其實係台積電。
麻煩在，咁重要嘅一環，竟然離中国咁近，離自己咁遠。中国不嬲都講到明，「收台」之心不死，一国兩制騙局俾香港人踢爆之後，台灣人唔再上當，只剩返武力攻台呢條路，中国出手嘅機會大咗好多。美國要減少對台灣晶片嘅倚賴，刻不容緩。
美國倚賴台灣晶片，同時，中国又倚賴台灣晶片。就算係華為，懶係用自己設計嘅晶片，啲晶片始終咪又係台積電整出嚟嘅。台積電有乜冬瓜豆腐，中国就冇晶片。所以一直以嚟，中国晶片靠台灣，係阻止中国武力攻台嘅重要因素。
台積電之前，晶片係美國同日本嘅世界，晶片公司都係設計生產一條龍。而因為整晶片廠太大投資，所以唔多晶片公司。但台積電嘅張忠謀，喺美日之間，喺台灣殺出條血路，只做代工，唔做設計，建立台積電嘅信譽，絕對唔會偷客人嘅商業秘密。結果改變咗成個晶片業生態，造就好多公司專心設計晶片，包括Nvidia同蘋果，而台積電就超越Intel，磨出晶片製造嘅最高技術，呢啲就真係put a dent to the world。
台積電一向收中美兩家茶禮，標榜中立，做科技界嘅瑞士。但今時唔同往日，美國啱啱宣佈重手制裁華為，搞到台積電唔敢接華為生意。中国見勢色唔對，惟有大力催谷自己間晶片公司中芯。中芯而家技術上仲係落後幾個圈，但可以預期，中国會不惜工本，盡快減少對台積電倚賴。
科技界瑞士 命運的抉擇
中国對台灣晶片倚賴越低，武力攻台嘅阻力就越細，中国犯台阻力越細，美國減低對台灣倚賴嘅壓力就越大。早排美國宣佈，點都要喺本土整返個晶片代工廠，叫台積電去做，即係叫台積電喺中国同美國之間，做出抉擇，一係企呢邊，一係企嗰邊。
台積電本來依依哦哦，話美國成本高，條數好難計，非常唔情願。結果前幾日，都係要交出投名狀，宣佈會喺美國Arizona設廠，美國嘅佈局，行多隻棋。呢邊廂，報道指中芯準備集資三十億，加快追趕台積電。中美決勝時刻，又行快咗一步。
撰文：宋漢生
fb : sunghsblog