疫情期間，英超唔少球星都抵受唔住枯燥嘅stay home生活，不時都違反政府隔離令尋歡。先有基爾獲加喺屋企開淫P，近期仲有傳某英超球星飛去巴黎搞「多人運動」party。最近就輪到中過武漢肺炎嘅車路士翼鋒赫臣奧杜爾夜會性感model，但過程睇嚟就唔多愉快，結尾搞到女方報警，連救護車都嚟埋，女方仲指奧杜爾想強姦佢，所以警察當場拘捕呢位19歲嘅英格蘭國腳。
「LV女」不適報警
據《太陽報》報道，奧杜爾前個星期喺社交網站識到嗰位女model，之後就開始互傳短訊，傾吓傾吓當然就越傾越露骨，女方仲不時大方share自己兒童不宜嘅「福利圖」畀奧杜爾，搞到血氣方剛嘅奧杜爾心癢癢，上星期六派人去接女方返自己位於西倫敦嘅豪華公寓聚一聚開心吓，仲有指奧杜爾要求對方一定要着性感內衣赴會。
據奧杜爾鄰居爆料，嗰位model當日大概夜晚八點就到咗奧杜爾嘅住所：「嗰女仔真係幾索，好似真人騷《Love Island》入面見到嗰啲女仔咁，有打扮過吓，而且仲拖住個LV行李喼。」
「歡聚」過程成謎
諗住奧杜爾以為可以過番個開心嘅夜晚時，但唔知係咪「歡聚」期間發生咗啲唔多愉快嘅事，女方喺凌晨竟然報警話自己唔多舒服，最後救護車嚟到送咗嗰model入醫院，而奧杜爾就因為違反隔離令俾警察拉咗。不過到咗星期一《每日郵報》就報道，原來嗰位女model指控奧杜爾企圖強姦佢，仲同救護員講奧杜爾有打佢，所以警察就以涉嫌強姦嘅罪名拉咗奧杜爾。
倫敦警方之後就表示，星期日凌晨三點左右，佢哋接報收到有女仔話自己唔舒服，警察同救護員去到現場將個女仔送去醫院，而現場被捕嘅一名男子就接受調查中，相信就係奧杜爾。有另一位鄰居證實嗰晚奧杜爾住嘅地方真係有開過P：「嗰晚真係有party嘅，不過就唔知係邊個搞，呢棟樓都住咗幾個球星，嗰晚搞完party之後就有警察嚟咗。」到咗星期日下晝，警察去咗奧杜爾嘅住所搜證。據指奧杜爾𠵱家已經保釋外出，而暫時佢同車路士都未有就事件有任何發表。