近數月，社交平台包括facebook等充斥炒股群組宣傳及洗版，有騙徒藉肺炎疫情大舉向賦閒在家的股民埋手，透過「四部曲」出擊，包括先透過炒股App如富途牛牛、fb或WhatsApp炒股群組，留言接觸散戶，再推介大價股博取信任及先嘗甜頭；其後推薦細價股，聲言會大升幾成甚至一倍。當股民貪心誤信買入後，股價便快速大跌八至九成。
記者：財經組
記者曾進入一個受害者群組，發現苦主遍及中港台，損失金額少則數萬元，多則過百萬元。有股民曾往警署報案但不獲受理，有輸掉廿年積蓄的太太向《蘋果》苦訴：「蝕咗50幾萬，我都唔敢同家人講，現在每日返兩份工！」
新移民：唔敢話畀個仔知
受害者珊珊（化名）是一位新移民，炒股年資僅三年，因為交易佣金廉宜，近月下載富途牛牛App，很快在朋友圈被數個「朋友」拉進WhatsApp股票群，當中一名騙徒連續三日跟她聊天，「知道我個仔喺外國讀書，想賺多啲錢。我本身持有比亞迪電子（285）呢啲，佢叫我清倉去買佢推介的常達（1433）」。
騙徒花數天跟珊珊「落藥」，珊珊覺得對方可信，將名下股票全數沽出，4月29日斥資67.5萬元買入常達，「佢當日上午11時45分叫我買，話下午升幾仙可以賺錢；我發現這股票才剛上市，而且在高位。她跟我講不用怕，升幾仙也有錢賺；我在11時57分買入，買入價0.375元，怎料下午1時開市便直插下去」。
常達當日收市價0.116元，較珊珊買入價跌69%。常達4月27日開始炒起，兩日內由0.123元炒至最高位0.435元，成交量由過往數百萬股，大增至8億多，明顯有大量「有心人」高位派貨，湊夠苦主便掟貨收割。
珊珊曾於0.1元沽出少量股份，仍持有約155萬股，市值12.4萬元，累積勁蝕逾55萬元，「我儲咗廿年嘅血汗錢，現在每日打兩份工，都唔敢話畀個仔知」。她曾聯合數名苦主到警署報案，卻不獲受理，原因是透過自己的股票戶口交易，不涉欺詐成份。
受害人陳先生（化名）股齡僅兩個月，因一隻股票損手七萬多元，「我加入咗個群組，導師叫Tommy，頭兩日不停推介股票，升咗5%左右，第三日就推介VICON（3878），我買咗六萬蚊」。第一注買入價5.12元，該股購入10日後，單日一度急跌10%。
中小企老闆蝕200萬
陳生其後再「溝貨」，斥2萬元在4.49元價位買入，「點知兩個鐘內再跌逾80%，得返0.6元，完全冇機會翻身；我見群組入面，有中小企老闆話蝕咗200萬」。最終，陳先生投入的8萬元只剩下不足7,000元。
而即使有多個受害者被騙，但群組仍然繼續運作，不停加入新人，再推介其他股票。
橋唔怕舊，最緊要有人受。