一直唔肯回應港人五大訴求搞到民望長期插水嘅特首林鄭月娥（圖），其實早喺去年9月已經喺政府閉門會議上自爆，話政府邀請過8間國際大牌子嘅公關公司協助政府「改善形象」，但遭8間大公司全部請食檸檬。
沈旭暉恭喜「深慶得人」
港府今年4月底再招標，邀請公關公司參與「香港重新出發」國際宣傳計劃。專門報道公關界資訊嘅網站《PRovoke》早前透露，至少3間公司已入標，包括2013年組成「Edelman中國集團」嘅美國公關龍頭Edelman；代表作包括為沙特人權狀況、壓迫婦權、公開處決等醜聞洗白嘅法國公關龍頭MSL；以及創辦人為新加坡亞洲新聞台CNA前記者、熟悉新加坡式新聞操作嘅新加坡公關公司Redhill。
難怪國際關係學者沈旭暉喺facebook轉述上述消息時，都忍唔住恭喜777，「深慶得人」。
政府就喺噚晚出稿回應有關招標工作嘅報道，話共接獲7份標書，稿中仲要特別加番句：「我們對是次招標的反應，感到鼓舞」，觀乎林鄭早前食檸檬食到儍嘅經驗，又難怪「鼓舞」，但相信外國人只要睇到中共近日點樣為落實所謂「全面管治權」而摧毀「一國兩制」，相信林鄭政府形象冇再出發嘅空間。