停擺期間，球員多咗時間留喺屋企，難免係想搵啲細藝打發吓時間，但估唔到曼城中堅史東斯，竟然會透過閉路電視系統監視前女友，十足癡漢咁！
英國《太陽報》指史東斯前任女友Millie早前報警，懷疑被人透過住所內嘅閉路電視系統監視。Millie喺2018年尾同史東斯分手後，仍獲准住喺兩人價值600萬鎊嘅舊愛巢，但Millie就懷疑史東斯透過登入屋內嘅閉路電視系統監視佢。
俾差佬的返差館問話
一位消息人士透露：「雖然史東斯搬走咗，但佢仍然可以透過互聯網登入觀察屋企嘅鏡頭，Millie收到啲短訊，覺得史東斯非常清楚佢喺屋內嘅一舉一動，覺得自己被監視，所以好焦慮。」於是佢喺上月尾向警方求助，而當地警方亦曾經上門向史東斯問話，但初步認為事件唔涉及犯罪行為，所以未有採取進一步行動，而事後Millie已獲豁免防疫居家令，可以搬番去父母嘅住所避一避。
唔知點解史東斯會想偷窺同監控前女友，或者兩個人真係再見不是朋友，皆因18年尾，青梅竹馬嘅兩個人突然宣佈分手後，史東斯即刻好決絕咁清洗手臂紋上Millie個樣嘅愛的紋身，之後仲被爆要求呢位前女友簽保密協議，唔畀對方對外公開分手原因同向外界提起兩人嘅過去，有指Millie拒絕簽署協議，亦對史東斯感到憤怒同失望。
洗走手臂表忠紋身
史東斯同Millie分手嘅原因，好多人都認定係呢位曼城中堅搭上第二個，即係現任美容師女友Olivia Naylor。Olivia大史東斯五年，本身係派對動物一名，之前啲相見到佢身材幾火辣，但兩人拍拖前，Olivia生咗個唔知係邊個經手嘅仔出嚟，當時已經走晒樣，至於史東斯點解拋棄幫佢生咗個女嘅好女友Millie，寧願執Olivia就冇人清楚。不過，史東斯本身就唔係咩好人，因為佢16年都試過做錯事，曾經同一位20歲女子喺餐廳相遇後就發生關係，仲要呃對方話當時已經同女友散咗，Millie之後原諒咗史東斯出軌，而後者手臂上嘅紋身，就係因為呢件事後想表忠誠嘅舉動。
史東斯家陣成個行為似癡漢咁，可能都同佢事業唔如意有關係，話晒16年曾以破後衞轉會費世界紀錄由愛華頓加盟曼城，但之後一直停滯不前，成日因傷同表現差而冇得踢正選。其實，曼城呢隊波真係好多負心漢，之前基爾獲加係咁，史東斯都係咁，其他想入「城」嘅球星老婆見到，會唔會即刻阻止自己老公轉會呢？