公民黨飛機師譚文豪早排落手落腳幫黃店宣傳，今次又落場幫黃色的士，仲由飛機師轉做的士司機，化身為的士豪！但原來唔講唔知，原來譚文豪同揸的士好有淵源，佢仲話今次終於可以「子承父業」。
噚日譚文豪喺fb出文，宣傳自己親自落場揸的士，力撐黃色的士台「騰駿的士管理公司」，佢仲話細個嘅時候，就係靠爸爸辛苦揸的士養起成頭家，𠵱家佢終於有機會子承父業，正式揸一次的士！佢呢個的士司機又真係似模似樣，佢喺fb貼咗自己開工前檢查機件嘅相，話任何交通工具出發前都要做足檢查。飛機如是，的士都一樣！
生意點呢？的士豪話噚日佢黃昏5點要先上黃色的士行嘅司機新入職培訓，仲話公民黨東區區議員鄭達鴻做咗佢第一個乘客，可以證明佢手車OK嘅！又希望大家日後Call車時都撐返自己人（電話：6627 6117）。
車主：賺錢同良知攞一個點
租的士畀譚文豪圓夢嘅35歲樺哥就話，自己傘運開始時入行，其間體會到好多參與抗爭嘅香港人需要幫手，亦睇到政府越嚟越橫蠻咁打壓巿民，直到反送中運動，佢哋亦積極參與。佢坦言：「政治嘅嘢我唔熟嘅，但我會見到乜嘢叫做良知！」
對於一般巿民覺得的士司機係藍絲居多，樺哥解釋因為大部份司機都係老人家，好多都住喺大陸，只係揸的士時先返港，所以好多時大陸講乜，佢哋就信乜，同喺香港土生土長嘅佢好唔同，佢仲強調：「我雖然搞盤生意係應該要賺錢，但要喺賺錢同良知中間攞一個點。」
李八方