祖雲達斯中堅基亞連尼（小圖）近日因為推出自傳，而自傳部份內容令佢近期成為新聞人物。繼早前喺書內爆巴洛迪利同菲臘比美路係佢生涯遇過最差隊友後，近期又爆佢大讚皇家馬德里中堅沙治奧拉莫斯，仲指對方喺2018年歐聯決賽整傷穆罕默德沙拿係頂級後衞嘅「傑作」。近期《阿斯報》節錄基亞連尼自傳中講述拉莫斯部份，基亞連尼對呢位皇馬守將讚不絕口，「拉莫斯係世上最好嘅後衞，佢有世上其他球員冇嘅，第一佢知道喺邊場重要比賽中發揮決定性作用，例如18年嘅歐聯決賽令沙拿受傷簡直係傑作。佢話唔係故意，但常理都清楚咁樣扯住對方嘅手落地，十居其九都會令對方手臂受傷。」基亞連尼又大讚拉莫斯嘅感染力，話有佢在陣皇馬防線全面升級，如果佢缺陣，皇馬就似一支唔識防守嘅球隊。