喺2018年因為同隊友開笑P俾阿仙奴警告嘅拿卡錫迪，日前又俾英國傳媒刊出一段疑似吸笑氣嘅片段。喺英國《每日星報》獲得嘅短片見到，拿卡錫迪當時瞓喺屋企梳化，將一個汽球含喺嘴，仲慢慢吸入疑似氣體，雙眼半合、神情迷幻（圖）。報道話，有關片段係由呢個法國前鋒自拍，仲透過短訊向啲fd自誇，佢都估唔到會落咗喺傳媒手上。拿卡錫迪喺18年8月英超開季前幾日，亦都被拍到同隊友奧斯爾、奧巴美揚、古安杜斯與哥拉辛拿斯，喺倫敦一間夜店飲酒狂歡，部份球員仲因為吸入笑氣而失去意識。據報阿仙奴當時已傳召各人「照肺」，警告佢哋要小心自己嘅行為。據英國傳媒講，喺英格蘭管有笑氣並唔犯法，但就嚴禁賣畀18歲以下人士。曼城翼鋒史達寧同阿士東維拉嘅基亞利殊，過往亦曾被爆出吸笑氣嘅醜聞。