武漢肺炎疫情搞到大家都要居家隔離，悶就梗，但有啲人就好唔守規矩，違反禁令出去玩，好似曼城右閘基爾獲加之前就俾人踢爆隔離期間同朋友召妓玩4P，自此被封賤男，但估唔到英國《太陽報》上周五再爆料，話有位英超球星比獲加更誇張，直情飛去法國開性愛派對，但就因為違反兩地禁足令，家陣搞到俾法國當局調查，不過基於法律理由，報道冇公開呢位涉事球星嘅身份。
報道話呢位富豪球星喺上周末坐私人飛機到咗巴黎，喺香榭麗舍大道一間豪華餐廳包場，同多位好友一齊邀請埋啲靚靚模特兒開P，飲酒作樂。目擊者仲透露，當晚大約有15人參加呢個派對，佢哋之後再轉場去附近一間豪華公寓繼續狂歡，而呢位英超球星仲被指喺升降機度就急不及待，同多名女子有親密身體接觸，之後仲同當中最少一人發生性行為。
毒販在場水洗唔清
一位爆料人士話：「當時大約有15個賓客，完全違反晒法國封城令。佢哋一直狂隊龍舌蘭同威士忌，同埋講嘢都講得好大聲，所以現場好嘈。大部份人之後轉到一間出租公寓繼續玩，場面完全失控。」唔單止有性愛，據報參加派對嘅人士中仲有一位係毒販，所以唔確定呢位球星當時有冇吸毒，但家陣佢已經因為違反防疫禁令，俾法國當局調查緊。其實，佢坐私人飛機去法國已經違反咗英國禁足令，喺法國餐廳開P亦違反法國禁令，因為當地未畀餐廳開門做生意，所以呢間涉事餐廳都麻煩，而且可能仲會被控協助非法賣淫，好似話當中有餐廳侍應做接洽人，幫呢位球星同佢朋友一齊搵呢班模特兒去餐廳。
多球星唔聽話外出
如果最後查到呢位球星玩女又吸毒，佢嘅足球事業真係隨時係咁先，但報道就話佢家陣已經返番自己球會參與操練，為下個月復賽做準備。其實呢段時間除咗呢位球星同獲加，仲有好多人都犯禁去開P，好似阿士東維拉前鋒基亞利殊、愛華頓前鋒摩斯堅恩、狼隊小將基比斯韋特甚至熱刺中場迪利阿里，都因為違規外出搞到連串風波，不過呢啲「多人運動」真係感染風險最大，請大家最好暫時收起色心，一係學諾域治後衞添姆高路斯咁，喺屋企睇片解決咪算囉，命仔緊要呀！