因武漢肺炎疫情，香港電影拍攝全面叫停，幕後頓時冇收入，入行多年的電影場務志偉，為了生計暫時轉賣車仔麵，日前他接受《蘋果》專訪，指今次疫情比17年前沙士打擊嚴重好多，電影業九成半人完全停工。他說：「難捱就唔係話難捱，搭車、食嘢計住點慳啲囉，有啲手足去做保安，一日有500蚊，咪用廿蚊食飯囉。」
縱橫電影業30多年的香港電影燈光協會會長文振榮（孖T）則說：「疫情再咁落去一定會流失好多人手，有幾個上咗年紀嘅拍檔同我講話冇辦法，揸小巴、的士，或者搵番份長工安定啲過日子便算。」Mon及Cindy均是入行近20年的資深電影化妝師，二人停工數月零收入，有找代表業界的馬逢國議員洽商政府資助，但他指二人未能夠證明屬於電影業界身份，未能幫她們去爭取，結果促使她們籌組「香港電影業髮型師及化妝師協會」，Mon說：「我哋相信團結先至爭取到，已經交咗表申請資助。」
採訪：盧妹、張明
攝影、攝錄：沈健程、葉君海、陳慧安、陳俊強