吃完母親節晚餐，碰到年青教師P，朋友新抱也，教師P在大學讀地理，後來有通識科之後，於是讀多一個通識碩士學位，教埋通識科，本來教得開心嘅，因為課程範圍比較濶，可用時事教材，學生不必背答案（因根本無標準模範答案可言），有學生覺得好難，亦有啲學生投訴考試冇標準答案，考試題目難捉路。套用內地講法，教與讀通識科，問題不是沒有，但問題不大，最近七，八年有建制派政客／評論員不滿年青學生大多數傾向民主自由，崇拜西方，不願意回大陸交流，特別係2019年反送中運動之後，一咪怪責通識科教壞學生，學生不讀中國歷史，不肯認同中華人民共和國之價值觀！
教師P話：「教通識愈來愈驚，一驚學生投訴，二驚政府殺科，等我地通識教師，有機會失去飯碗。」以前還以為董建華李國章羅范椒芬孫明揚吳克儉留下嘅通識科可以持續下去，料不到林鄭錯搞送中條例，激起千重浪，當權派益發指責通識教育，睇落真係有機會殺科噃！林鄭接受大公報訪問，居然指責教育界似無掩雞籠，之後又講通識教育夠時候要全面檢討，好明顯係說話不留情面，今年立法會選舉過後，建制派仍然在立法會掌握過半數議席嘅話，就會將殺通識擺上議程。
林鄭講無掩雞籠，當然係發噏風之類。全香港各行各業之中，教育行業嘅監管最嚴，金融界無官辦銀行，官辦經紀，但教育方面就有官中官小官大，八間主要大學都係由政府透過教資會撥款營運嘅，教育局長每年出席UGC委員會議，發言極有份量，大學唔可以自行增收大一學生，完全係公立大學模式。中小學所有課程範圍，更全由教育局規定，教科書（通識科除外）全部要教育局審查批准，更新及修改課本內容要得到教育局同意，換言之，教育局嚴控中小學，把關極嚴，所有津中津小要安裝冷氣，都要得到教育局批准，若話教育界係一個雞籠，此雞籠本係用鋼鎖封死，何來無掩！林鄭發言前有冇問過楊潤雄呀？相信係冇，林鄭似是一位egocentricity極重嘅女士，以自己為中心，不會聽取他人意見，大公報訪問林鄭，頭版有林鄭大相，有一位精神專科醫生留意到林鄭身傍有一張几仔，上放三張相片，全是林鄭個人獨照，令中環人嘩的一聲！商界人士在辦公室放相片是可以的，但一定係家庭照，兒女照，以示着重家庭價值，邊會有人放三張自己照片㗎！