香港疫情開始緩和，特區政府算係識做，在5月10日母親節前放寬限聚令，餐廳內可坐8人一枱，酒吧亦可營業，於是乎餐飲業迎來一場及時雨。上星期日午後，有親戚召集七人到九龍福臨門飯聚，已經訂到兩點，點知去到仍然要呆坐30分鐘先至有枱，可見母親節生意之旺。親戚G估唔到要等咁耐，因為對上一個星期日（5月3日），佢一家三口到九福，見到場面清靜，吉枱多過食客，料不到七日後，形勢完全改觀也。
香港人重視母親節多過父親節幾十倍，從馬會在父親節馬照跑，在母親節則無賽事，可見一斑。餐飲老前輩楊位醒講過，酒樓母親節一天生意，勝過父親節多多，至於為何人人孝順阿媽，對阿爸就平平對待，則有待社會心理學家研究。
飲完茶返屋企，已近4時，翻閱書報，見到明報5月7日有一篇教育界議員葉建源文章：「被政治加害的中史教科」，講最近愛國派大力抨擊嘅「鴉片戰爭事件」（中三中史教科書）引用耶魯大學中國歷史大師史景遷（Jonathan Spence）講林則徐，葉建源話原來教科書有資料一、資料二，還有一個練習，填寫林則徐禁煙的背景，方式和結果。被愛國派「截圖」大罵嘅一頁只不過是練習中段一份參考資料，主文講鴉片戰爭史實就冇愛國派提過，換言之，就係有人屈得就屈，斷章取義，連教科書根據教育局學習指引，即鼓勵學生從正反不同方向思考都唔可以。愛國派只容許一個觀點，一個角度。睇完葉建源篇文章，左丁山想起讀中學時，老師講英軍打敗清兵，講到咬牙切齒，痛心疾首，就係單線教學，入到大學先至識得諗，英軍入侵，與滿清大官貪腐無能，不明世界局勢不識談判，亦有關係。
晚上到馬會吃母親節晚餐，碰到不少朋友及家人，其中一家有媳婦係中學老師，仲要係教通識嘅。問佢停課期間做乜，佢話下學期要教中國現況，於是不斷搜集教材，越來越驚，因為見愛國報紙及建制派成日鬧中學老師害人子弟，不愛國，又有學生家長篤灰投訴，情況嚇人，校長已吩咐佢教書要小心點，老師話：「通識教學宗旨係要學生認識多方面資料，正反辯論從不同角度思考，但有人會指責我哋誤導，不灌輸中國官方材料，我好驚㗎！」睇嚟學校已有藍色恐怖，不如用晒中資出版社教科書啦，不斷引用內地教材，踢走晒本港出版社、英國出版社嘅教科書咪得囉，教歷史就下令唔准引用史景遷及美帝英殖作者言論，只可學習內地歷史教科書，林鄭滿意喇啩？