周三意甲球會開完視像會議後，20隊已經達成共識，意甲最快會喺6月13日重開，𠵱家仲差意大利政府批准。成事嘅話，意甲將會繼德甲後，成為五大聯賽第二個成功重啟嘅聯賽。不過聯賽要順利完成，都要求神拜佛期望每位職球員健健康康，因為只要有一人中招，所屬球隊全部人就要停止比賽隔離15日。
一人中招要全隊隔離
早喺今個月初，意政府已經逐步放寬防疫措施，球員已經可以返球會基地個人訓練。今次賽會亦宣佈，各隊喺下星期一、即5月18日開始可以全隊集訓。雖然上星期費倫天拿先公佈隊內有包括後衞馬田卡沙利斯等三名球員中招，但都無阻意甲復賽嘅決心。20間意甲球會喺周三開視像會議後宣佈，按照當地政府嘅放寬防疫措施時間表同醫療建議下，決定意甲會喺下月13日閉門重開，但目前仲差政府批准。意甲喺3月9日起暫停，各球隊大概仲有12至13輪未踢，賽會計劃下月13日起，每星期上演兩輪賽事，喺8月2日煞科，令參加歐戰嘅球隊可以踢埋歐聯或歐霸盃，至於踢到4強次回合嘅意盃就會喺7月進行剩低嘅賽事。
不過聲明都話到，如果5月18日起有任何職球員病毒檢測呈陽性，全隊所有人都要接受15日隔離，意甲對重啟後有職球員確診嘅處理手法比德甲仲謹慎，德甲只係要求確診者自我隔離。拉素隊醫佩仙尼就認為呢個全隊隔離嘅決定好荒謬：「根本就係荒謬，如果全隊接受咗病毒檢測，得一個人係呈陽性，點解要將其他陰性又健康嘅人隔離15日，當佢哋有病？委員會都唔聽球隊軍醫嘅意見，只係識坐喺辦公室紙上談兵，我覺得意甲應該跟德甲嘅處理手法囉。」
C朗練波佐真娜派福利
意甲班霸祖雲達斯月初就開始叫球員返都靈準備復操，基斯坦奴朗拿度（C朗）亦喺5月4日由葡萄牙返咗意大利，正自我隔離14日。隔離緊嘅C朗都冇偷懶，喺ig分享自己同九歲大仔操練嘅影片，仲話：「有其父必有其子」！兩位男士喺花園練波，C朗女友佐真娜就喺室內健身，佢仲喺ig「賣大包」，上載自己着運動Bra Top喺健身室嘅相，展露豐滿上圍外，仲坐喺健身凳上擺出誘人姿勢，真係睇到人流鼻血。