ESPN報道，英冠正評估喺英超前復賽嘅可能性，而英格蘭足球聯賽賽會（EFL）已接近完成最早喺6月6日重啟球季嘅計劃，EFL有信心英冠可以喺6月第1個周末復賽。EFL強調，要喺7月31日前完成英冠需要56日，如果可能嘅話，屬意復賽日期為6月6日。報道話EFL仲同緊71個屬會談判中，但對英冠球季喺今夏完成感到樂觀。EFL董事局喺禮拜三嘅會議，會制訂更清晰嘅計劃，討論點樣可以閉門完成球季，同埋制定更嚴格嘅武漢肺炎病毒檢測同訓練指引。所有英冠球隊尚餘九輪比賽，即係仲有108場比賽未踢，另外仲有附加賽。英冠因武肺停擺前，列斯聯暫以37戰得71位列榜首，領先第2位西布朗1分。
英超重開傳曼熱打頭陣
另外，英國《每日郵報》爆料，獲得英超轉播權嘅電視台，已接到通知英超將喺6月12日或6月19日，兩周其中一個星期五晚重開，上演一場「揭幕戰」，然後星期六、日各進行四場賽事，剩底一場會安排星期一上演，以完成首輪10場比賽。有傳重開第一擊會係曼聯作客熱刺。轉播權方面，據報英國天空體育每輪將會播放1場周五同埋另外4場比賽，其餘五場有意免費播放，有可能喺YouTube直播。