受武漢肺炎疫情影響「生計」嘅唔止係小商戶，政黨亦都如是。唔似得建制派政團有西環照住，民主派政黨嘅一分一毫都係嚟自市民，好似民主黨咁，今年忍痛取消年度籌款晚宴，於是要靠獎券籌款，原先嘅目標係260萬元，𠵱家就要加碼到460萬喇。
200街站目標籌460萬
民主黨副主席羅健熙同埋中委袁海文噚日宣佈佢哋賣獎券嘅情況。袁海文話，以往籌款晚宴可以為民主黨帶來400萬元收入，如今冇咗晚宴，400萬元中嘅200萬元就落埋入賣獎券中，民主黨聽日開始至7月9日，會喺全港18區擺100至200個街站賣獎券，目標籌460萬元。講返已經取消嘅籌款晚宴，羅健熙話本來3月搞，1月疫情開始嚴重時開始傾延期，一度諗住到夏天疫情好轉就6月搞，但係事態發展令佢哋覺得真係冇得勉強。
但淨係靠賣獎券都唔掂嘅，羅健熙話佢哋諗緊其他方式籌款，例如月捐、網上捐等等，以往晚宴、獎券並行，可以少啲落區籌款，𠵱家就要勤力啲喇。至於民主黨獎券，照舊廿蚊張，但係獎品依然豐富，頭獎有無反相機、二獎係名牌吸塵機、三獎就有名牌喇叭，而平板電腦、好多人都想要嘅氣炸鍋都有。