環球時報總編輯胡錫進之「中國急需增持核彈頭至一千枚」之說，左丁山暗呼不妙。難道胡錫進這類中國鷹派在中國興起？向幾位對中國更有認識的朋友請教，如何解讀胡總之言？朋友T說：「唔使驚，只是內地鷹派不滿劉鶴與努欽通電話，態度軟弱啫！」劉鶴點樣軟弱？朋友T嘅意見係：特朗普為咗競選，大打開口牌，將C19疫情傳播責任歸咎中國，周圍叫盟國支持台灣參加世衞大會，拉攏歐洲澳洲等追查肺炎源頭，着着進逼中國。中國開始覺得唔妥，於是劉鶴聽努欽電話，表明會如實執行中美貿易協議，希望將美國攻勢緩和吓，但一啲中國鷹派不服，於是拋出增加核彈頭之說！
朋友S則認為胡錫進不必理會，此人聲譽在內地甚差，經常藉環球時報罵香港非建制派，只為自己製造聲勢，朋友S更傳來內地名嘴崔永元痛批胡錫進，完全不留情面，胡先生有無回應呢？好似冇乜人提過。朋友S話胡總嘅角色類似三國演義裏的楊修，聰明絕頂，經常猜中上意而又能用凡人無法想像的角度和觀點把上意闡釋，偶爾猜錯也無所謂，畢竟他不是代表中宣部。
哦！明白了，誰更出位，誰更愛國，直至中宣部叫停為止，例如內地五毛網民曾大罵NBA侮辱中國，要杯葛NBA，NBA不道歉，也不投降，卒之內地五毛不再出聲，件事情就冇咗，顯見內地民粹是鬧人也要看對方係邊個，欺善怕惡到極。
胡錫進之增持核彈頭論，在內地角度嚟講，係可以做，不可以大聲講。大張旗鼓咁宣揚增持核彈，即係要與美國展開軍備競賽，上次有同樣事情發生係列根時代。列根總統說未來戰爭係星球大戰，要力壓蘇聯。蘇聯中計，全力發展星戰武器，產生咗經典例子，牛油麵包與槍彈，邊樣更緊要？卒之軍備競賽拖垮蘇聯經濟，成為蘇聯解體之大背景。今日中國代替昔日蘇聯地位，是否準備與美國再來一次類似競賽？中國經濟是否可以負擔得起？胡錫進之流梗係話得嘅，但習近平力推六保，不談保6之時，佢有冇咁不顧一切，大幅增加軍費，削減民生支出嘅心態與魄力呀？而且要咁多核彈頭都係冇用嘅啫，有能力互相指嚇，達成恐怖平衡就得，真係使用嘅話，美國死人，中國死得更多，邊個中央軍委會主席夠膽下令使用。中美戰爭係會有嘅，不過係經濟戰、科技戰、宣傳戰！