【雪中送炭】街頭抗爭在武漢肺炎疫潮下趨於平靜，但對背負刑責正等候上庭的候審者，心理煎熬其實從未停歇。面對將影響一生的審訊，被控的抗爭者或會選擇穿上正裝以示尊重，有黃圈西裝店得知手足需要，即使生意因疫情急挫五成，仍贊助上庭衣服，只望為他們添一點印象分，分擔一點壓力。
記者：佘錦洪
攝影：陳海威
位於尖沙嘴的西裝店Zuitable，自去年年底開始義務為手足提供上庭衫。負責人之一的Echo原打算買保護衣物派發，但又怕未必是前線真正需要，於是想到與自己工作結合，「人靠衣裝，如果上庭嘅時候可以有一套整齊嘅西裝，先唔好理外界點睇自己，第一印象至少都一定正面。」
疫情下生意插水 當樹洞解心結
作為獨立經營的小店，Echo最初計劃只派發50套西裝，卻發現前來度身領西裝的手足較預期多，加上被標籤為黃店後帶動生意，「更加覺得應該將賺咗嘅錢幫返手足」，於是決定不再設限，「只要畀到傳票我就得」。沒想到一場武漢肺炎生意應聲插水，比淡季再跌五成，反陷生死存亡階段，但仍表明義助將會持續，「只要能力範圍可以做到我哋都會繼續做」。
持續大半年的運動抗爭者有男有女，一直只做男裝的Echo，輾轉接觸到被控暴動罪的女手足哈哈（化名），決定特別為她度身訂製一套女裝套裝，出錢又出心，皆因能夠感同身受，「佢呢個年紀廿零歲應該要返學，佢應該無憂無慮、唔需要擔心啲乜嘢。所以有陣時佢哋上到嚟（取衣服），好基本可能聽佢哋呻下，有啲咩都可以做多啲，希望幫到佢哋囉」。