特朗普為咗競選連任成功，挽救民望落後於佛系候選好人拜登，打中國牌勢所必然。民主黨拜登受疫情限制，唔可以出嚟講嘢，搞不成競選造勢大會及全國競選活動，只能在家裏發表談話，依家邊度有人聽吖，但居然能夠在民意調查領先特朗普幾個百分點，實在反映得出美國人對特朗普管理疫情危機之手法甚不滿意。有二千三百萬人失業，逾130萬人確診，8萬人死亡之時，無論邊個在任總統都會備受責難啦。因為疫情嚴重，美國人普遍不滿意中國，3月份Pew Research Center嘅調查顯示，66%美國人對中國印象不佳，比特朗普就任時高出20個百分點，係自2005年有此調查以來嘅最負面紀錄，超過68%美國人認為中國係大威脅，尤其是在環境污染及網絡攻擊方面。特朗普三年幾以來挑起貿易戰，大打台灣牌，南海航道自由論，不斷反覆向美國人民滲入反中情緒；加上今年肺炎疫情，美國人更加反中情緒高漲。
民主黨當然體察到美國民情，故此共和民主兩黨成日鬧交之餘，突然有兩黨共識，所謂bipartisan見解，就係一致贊成向中國施壓。佛系候選人拜登以疫情嚴重針對特朗普，共和黨廣告就攻擊拜登兒子搞中國生意，向中國跪低，特朗普打開口牌話北京想佢落選，即係爭取反中票，其實北京點會支持拜登吖，民主黨總統多數講人權民主，與比較少從貿易生意着眼。但特朗普係生意人，講經濟遠勝講人權民主，北京知道金錢可以滿足佢，較容易應付。民主黨講人權咯喎，侵犯共產黨底線，北京最憎嘅啫。
中美關係急劇變化之餘，劉鶴突然肯接聽美國財長姆欽電話講中美貿易協議，好明顯就係美國溫和派講錢，官員唔想一月簽定之中美貿易協議受疫情損害，希望中國如實執行，而劉鶴肯接電話就意味中國溫和派希望情況不要再惡化下去，願意與美國在貿易方面合作。但美國有鷹派拿華路，中國亦有鷹派小粉紅及環球時報老總胡錫進，呢位老胡在上星期於微博發文，聲稱：「中國需要在較短時間裏將核彈數量擴大到千枚的水平，包括至少要有100枚東風-41戰略導彈……我們面臨着越來越不理性的美國進行艱難的互動，對方只相信實力，其實我們沒多少時間圍繞着該不該增加核彈扯淡，我們只需要只爭朝夕做這件事。」中國若大量增加核彈頭，必與美國觸發軍備競賽，後果嚴重，影響全世界。胡錫進地位官階低，聲音大，代表中國狂熱民族主義者的一些聲音，與美國民粹主義者相呼應。