意大利傳媒報道，阿特蘭大青年軍球員、現時被外借到意丁球會Legnano嘅連拿迪上周五因腦動脈瘤出事送院，延至周一早上去世，終年19歲。據報道指，連拿迪上周五喺屋企訓練期間因腦動脈瘤出事昏迷，其後隨即送往當地醫院搶救，惟仍無力回天。現球會Legnano及阿特蘭大亦就連拿迪嘅去世發表聲明，Legnano指連拿迪送院後嘅三日一直勇敢同病魔搏鬥，可惜未能戰勝疾病，佢嘅去世係令人震驚嘅悲劇。而阿特蘭大嘅聲明就指連拿迪一直係個積極嘅球員，亦深得隊內上下歡迎。13歲就加入阿特蘭大青訓營嘅連拿迪，曾於16年先後贏得U17聯賽冠軍及超級盃；今季則為Legnano於聯賽上陣23場並射入1球。