熱刺前鋒孫興民喺上周五終於服完兵役，結束喺濟州島海軍隊為期三周嘅軍事訓練，表現出色嘅佢喺班中成績位列前五名，據指佢當日已乘搭飛機返到首爾，稍後就會啟程返回倫敦，再進行14日自我隔離後就會正式歸隊。周一孫興民就喺佢個ig貼咗一張開心舉起V字手勢嘅相，示意佢完成軍訓後開心回歸日常生活，唔少球迷都留言歡迎佢回歸，佢嘅熱刺隊友奧里亞留言讚佢係「勇士」，迪利阿里同出名係熱刺球迷嘅NBA名宿尼殊（Steve Nash），都留咗好多個藍心emoji支持佢㖭。據報贏得亞運金牌嘅孫興民，完成軍訓後仲要喺2023年前完成544小時嘅社會服務，先至算正式完成佢嘅軍事責任。