美國白宮揸弗人特朗普堅持唔戴口罩，跟佢打工之人，自然唔敢戴口罩，副總統彭斯巡視著名嘅Mayo Clinic，周邊所有醫生護士職員都戴晒口罩，只有彭斯一個唔戴，於是彭斯嘅新聞秘書Katie Miller（25歲）見記者時，個個記者都戴住口罩，只有Katie一個唔戴。唔好彩，現在Katie確診，白宮內特朗普一名侍從（負責安排飯盒）確診，Katie老公Stephen Miller也在白宮工作，係總統高級政策顧問，特朗普在2017年就任總統，演講詞就係呢位米勒先生撰寫嘅。還有，負責保護總統嘅特工，亦有多名保鑣確診喎。
依照香港檢疫標準，成個白宮不知有多少人係確診者之緊密接觸者，包括特朗普與彭斯，應該隔離14日，但特朗普把口係硬嘅，一味講：「我好少同佢地接觸，我日日檢測都冇事。」反而常在特朗普身邊嘅霍治醫生Anthony Fauci以及CDC總監Robert Redfield，都自認係緊密接觸者，自願留家工作。
唔係大人物就唔會中招嘅，英國首相約翰遜就曾確診入過ICU，自認死過翻生啦，佢入院時外相藍韜文代理首相職務；俄羅斯總理一樣確診，職務由副總理暫代。照計依家特朗普與彭斯都係高危人物一類，假如特朗普唔覺意受傳染中咗招入院，職務由副總統彭斯頂上，若果彭斯又中招，邊位擔任臨時總統？哎吔，不得了，就係特朗普之死對頭，眾議院議長佩洛西，這還得了？特朗普與彭斯豈可讓這樣恐怖的事情發生！
特朗普現時必定好焦急，趕住要「重開美國」，讓工人復工，阻止失業率再度上升，但同時又怕疫情難控，美國確診及死亡人數節節上升，正處於兩難之間，唯有找人出氣，將傳播疫情責任往中國推，所以日前就講到，今次美國受到C19襲擊，慘過珍珠港與911，中國其實可以在源頭就阻截病毒咁話。言下之意，就係指中國未盡全力或隱瞞病情。呢啲說話，中國自然聽唔入耳，而德國情報消息好似配合佢咁，明鏡周刊上星期披露德國情報指習近平在1月21日要求世衞總幹事譚德塞不要發佈C19可以人傳人嘅壞消息，以及延遲發佈大流行（pandemic）警告，譚德塞呢勻尷尬嘞，記者問唔到習近平啫，追問譚德塞就冇困難，佢會點答？若果呢段報導屬實，特朗普更加振振有詞，對華施壓，中美關係更緊張，影響埋香港台灣，北京一定不甘示弱，講唔定中聯辦會大力喝令林鄭打壓泛民，刺激群眾再次上街！