喺武漢肺炎侵襲球壇之際，白俄羅斯聯賽一直堅持比賽，仲開放畀球迷入場睇波，成為疫情期間歐洲最後淨土，仲同唔少海外電視台，簽咗轉播權合約賺到盤滿鉢滿。英國《每日郵報》早前訪問過一位FC明斯克嘅球員，佢話「怕病就唔係男人」！咁就睇得出白俄人當武漢肺炎冇到。不過當地武肺病毒禮拜一終於殺入球圈，導致兩場聯賽要延期。白俄羅斯足總禮拜一喺官網宣佈，超聯球隊FC明斯克（白衫）同甲級球隊高美爾火車頭，都有球員出現懷疑確診個案，因此足總宣佈原定禮拜六兩隊要踢嘅聯賽延期。不過聲明中重申，該國足總會繼續採取措施，防止病毒喺比賽中傳播，包括喺球場內安裝酒精消毒液、出入口為觀眾量度體溫等，似乎未有暫停聯賽嘅打算喎！