【生安白造】
【本報訊】原意為減少社交距離、預防武漢肺炎蔓延而設的限聚令，結果淪為濫權「紅牌」，限制港人人身、言論自由。回顧條例實施個半月，就第599G章僅有警方曾發告票及檢控，其他執法部門全部只曾巡查及勸喻。對防疫幫助多少仍屬未知，但當今日人人走出街頭都有可能被罰款2,000元，有人不甘為方便而付錢了事，誓要上庭抗辯拒認「犯聚」還自己清白。
記者：黃翠儀
俗稱限聚令的《預防及控制疾病例》由3月29日生效，分為針對業務及處所的第599F章及禁止群組聚集的第599G章，後者已淪為打壓港人惡法。人稱「劉公子」的商人劉定成，上月28日與三名友人在中環IFC商場便收過告票，當日已決定不會繳交罰款。
劉定成︰擬聘律師上庭
劉公子回憶當日傍晚時分他們被警員漫無目的地驅趕，其後要求查身份證，惟當他走到時裝店取回個人物品及出示身份證時，「警方就突然話你哋唔走得喇，然後就抄牌發告票，我直情覺得係有針對性」。他暫時計劃聘用律師上庭，「我唔會交錢，當日有區議員目睹一切，又有傳媒嘅片，我係會抗辯到底」。
5月1日「霸氣哥」公民黨成員曾建峰在沙田新城巿廣場，更是一個人被票控兩次，當日他一人被數十防暴警拉封鎖線圍堵畫面在網上瘋傳。他當時本來在看網上直播，「喂大佬，點解差佬可以咁樣衝入商場？我就喺度質詢咗一陣，跟住一隊防暴就衝落嚟包圍我要告我，但我得一個人，我點樣犯限聚令呢？」
諮詢法律意見後，他同樣決定上庭抗辯，「雖然好多人講緊法治已死，係咪就乜都唔做，就咁乖乖地交錢益庫房呢？反而大家上庭抗辯，如果成功起碼立咗案例」。
即使條例列明有群組聚集可獲豁免，包括「為傳揚有助於預防及控制指明疾病的資訊或技巧（或為處理有助於預防及控制指明疾病的供應品或物品）而進行的群組聚集」，但有工會或團體設街站派發防疫物資時，例如5月6日建築地盤職工總會有10人在海富行人天橋派發消毒洗手液、防疫小冊子等物品時，就全部被票控。
當日有份被票控的成員阿V說，警方警告街站雖有派防疫物資，但夾雜其他資訊或構成公眾集會，「但條例冇寫唔講得其他嘢，香港唔係應該有言論自由？而且幾十個警員阻撓幾個人嘅街站，其實疾病唔會因為你嘅職業而令你有抗體」。
「認為冇犯過事就應抗辯」
根據條例，收到告票21日內沒有交回罰款就會收到繳款通知書，若想抗辯就要10日內以書面回覆。法政匯思成員、何旳匡大律師指出，被告有權選擇抗辯，「每一個認為自己冇犯過事嘅人都應該要咁樣做，而舉證責任係喺控方身上，唔係被告要證明自己清白」。
現時巿民若要尋求相關法律支援，可經公民黨fb帖文填表，亦可向民主派區議員或日前成立的「599關注組」求助。
關注組發起人之一鄭偉成說，根據經驗當事人有告票編號便可以寫反對書交回警總交通組，有人已收到警方回信表示正調查其案件。