中超球隊天津天海（前身天津權健）上季因老闆束昱輝被收監陷財困，雖然成功護級留喺中超，但最近又同萬通控股嘅交易談判破裂，結果周一正式向中國足協申請退出聯賽兼宣佈解散，記得當年曾豪言話要3年贏亞冠、5年贏世冠，又話連球王美斯都分分鐘自願加盟，家陣聽落認真諷刺。
用五月天歌送中超隊終
早前有指天海同潛在買家萬通談判破裂，後者決定退出並取消注資，周二天海亦都宣佈解散，聲明中話：「好感謝球會上下上季嘅努力，喺極度困難嘅情況下都成功護級留喺中超，可惜球隊最終決定要解散。」球會嘅微博仲用咗台灣天團五月天嘅《乾杯》同各位球迷告別：「友情曾像，諾亞方舟，堅強誓言，希望大家要樂觀面對，活在當下！」另外，依照中超嘅規定，為保聯賽完整性需要有球隊頂上，按照遞補次序，深圳佳兆業有望成為遞補球隊重返中超。
喺天津天海仲叫權健嘅時候，的確喺中超風光一時。2015年，權健自然醫學集團有限公司（簡稱權健）嘅老闆束昱輝收購球會，由天津松江改名為天津權健，第二年仲請咗簡拿華路嚟執教，用中超嘅班底打中甲，16年就成功升上中超，球隊亦擁有巴西前鋒柏圖同比利時中場韋素，中超首季就以季軍完季，之後一季亦成功打入亞冠盃八強。不過，束昱輝上年涉及非法傳銷等犯罪活動被判刑九年，球隊亦因為咁被天津市足總託管，財困下終於星散，亦開始走向末路，最終宣佈解散。
功夫踢頭姜至鵬終道歉
大陸網民係咁搵番束昱輝當年嘅金句鞭屍，佢曾經講過要打造權健成為「建設百年」嘅球會，點知未夠10年就玩完。佢仲曾經講過：「未來唔係我向美斯報價，係美斯主動同我哋報價」、「球隊用中超嘅班底打中甲，就係要升上中超，三年後我哋就要贏亞冠盃，五年後就要贏世冠盃。」大陸網民就話原本今年已經係五年嘅限期，點知球隊連亞冠盃都未贏到就玩完，難免欷歔。
不過，中國人就係鍾意吹到上天唔知醜，冇品亦都唔係新鮮事，好似後衞姜至鵬半年前喺東錦賽「功夫踢頭」向日本嘅橋岡大樹施襲，當時毫無悔意話係對方個頭主動掂佢隻腳，咁都講得出認真厚顏無恥。半年後，姜至鵬突然認錯，正式向橋岡道歉喎，唔知係咪受到咩人啟發，可能突然驚他朝君體也相同。